Ministri i Shtetit për Mbrojtjen e Sipërmarrjes, z. Eduard Shalsi u takua me përfaqësuesin e Innovation Norway, z. Tore Lasse By ku diskutuan rreth projekteve të ndryshme që do të implementohen shumë shpejt në Shqipëri.
- Tore Lasse By tha se Innovation Norway po planifikon të hapë përfaqësinë e saj në vendin tonë dhe do të ofrojë grante për biznesin e vogël dhe të mesëm duke filluar nga viti 2020.
“Të gjitha bizneset mund të përfitojnë nga grantet përsa kohë plotësojnë kushtet e vendosura. Kemi si qëllim inovacionin dhe modernizimin e pajisjeve që ndikojnë në uljen e ndotjes së ambjentit, rrisin sigurinë e punonjësve në ambjentin e punës, forcojnë lidershipin e femrave, si dhe ofrojnë mundësinë e prodhimit në Shqipëri për kompanitë norvegjeze”, u shpreh ai.
Ministri Shalsi tha se ky është një lajm shumë i mirë, pasi një iniciativë e tillë do të sillte jo vetëm mbështetje për biznesin, por edhe një ekspertizë shumë të vlefshme për vendin tonë.
Innovation Norway është instrumenti kryesor i qeverisë norvegjeze për rritjen e inovacionit dhe zhvillimin e bizneseve, gjithashtu edhe për projektet e tyre mbështetëse që ofrojnë grante për bizneset e vogla dhe të mesme në Ballkanin Perëndimor.
